أنا لحبيبي و حبيبي إلى لا يعتب حدا و لا يزعل
تسللت الى مسامعى كلمات وصوت فيروز الهادىء الرخيم كما لو كان يريد الا يشعر به غيرى --مصاحبا معه رائحة عطرى المفضل " "
ماهذا؟ اهو حلم ؟ الا زلت نائمه؟
بالطبع لا فالازلت اشعر بوسادتى التى ادس بها راسى كل يوم بكل ما فيها من هموم ومتاعب واحلام يومى فتحتوينى بحنان لم اشعر به سوى لامى 0
شعرت بما يداعب خصلات شعرى التى تناثرت على وسادتى هنا وهناك كمن يريد ان يوقظنى ولكن برقه واحساس مرهف
فتحت عينى وانا متردده خائفه ان استيقظ ربما كان حلم ولا اريد ان اخرج منه فالطالما اشتقت فى خضم الحياه الى تلك الهمسات واللمسات التى قد تزيح عناء يومى بأكمله0
* حقك على --ماتزعلشى 00ما اقدرش والنبى والنبى ما اقدرشى " كان صوت زوجى بالطبع المبادر بكلمات اغنيه ليلى مراد"مداعبا انفى بورده حمراء قائلا :*كل سنه وانتى احلى واغلى حب
- يا سلااام اخيرا افتكرت ؟ بعد ايه؟
* هو انا اقدر انسى ؟؟" غامزا باحدى عينيه فى مكر "
* حد ينسى اليوم اللى سجن نفسه فيه برضاه
اعتدلت من مرقدى متحفزه --
- نعم نعم سجنت نفسك ؟؟
* ايوه -سجنت نفسى فى قفص الماظ ومعايا اجمل ملاك حوريه من الجنه يا نااس ومفتاح القفص مش مع واحد لاء ده مع خمسه !!!
هنا انتفضت من مكانى كمن لدغه عقرب
- هى الساعه كام ؟ العيال صحيوا ولا لسه؟
* يعنى انا عامل لك الجو ده كله وفيروز وورد وعطرعشان اصالحك وبرضه تقولى لى" العيال صحيوا ولا لسه ؟؟"
كاشرا عن انيابه رافعا حاجبه الايسر جاحظ العينين
ضحكت بصوت مرتفع 00انا شكلى كده برضه؟؟
* طب بصى فى المرايا وقولى اللى قولتيه كده تانى
- سامحنى يا حبيبى --والله انا عارفه انى مقصره فى حقك
بسبب البيت والاولادوالشغل
* هو ده بقى مربط الفرس
- هو ايه؟ وفرس ايه؟
* البيت والاولاد مانقدرش نسيبهم عشان الشغل --لكن نقدر نسيب الشغل عشان البيت والاولاد
- اسيب الشغل ؟ ايه الكلام ده؟
* الاول كان لازم تشتغلى عشان نساعد بعض ونبدأ حياتنا ونكبر سوا والحمد لله كبرنا سوا --وانتى من حقك على انى اريحك بقى من التعب ده بره وجوه
لا انكر اننى كثيرا ماتمنيت ان اتخذ هذا القرار فطيله سنوات العمل وانا اصارع فى معترك الحياه مابين عملى وما الاقيه من مشاكل خاصه بالطالبات والاداره والزميلات وبين ابنائى ومراجعه دروسهم ومرضهم ومتابعه شئونهم الخاصه والبيت ومشاغله وع عدم وجود من يساعد لا خادمه ولا غيرها
كان القرار فى وقته كهديه عيد زواجنا الرابع عشر وحمدت الله ان زوجى هو البادىء بالطلب حتى تكون فى ميزان حسناتى عنده " بس عشان خاطرك انا سيبت الشغل " هذه العباره لها وقتها اكييييد
اااااه من بنات حوا
ليست هناك تعليقات:
إرسال تعليق