اليوم هو اول ايام عطله نصف العام الدراسى 00ما اجمل العطلات لجميع افراد الاسره هى استراحه من كل شىء بدايه من الدراسه والعمل مرورا بمواعيد الاستيقاظ والنوم وانتهاءا بأعباء اليوم من بعض الالتزامات 0
وقد عهدت منذ طفولتى ان الاجازه حريه بلا قيود واضحه ولكن لها قيود خفيه وضعتها امى لنا انا واخواتى 00
حريه فى موعد النوم المتأخر والاستيقاظ المتأخر ايضا ولكن قيود فى عمل الواجب علينا اثناء الاجازه 00فانا واختى نقوم بترتيب المنزل وتنظيفه يوميا والاولاد عليهم شراء متطلبات البيت من الخارج والالتزام بموعد الغداء هو موعد مقدس لايجوز تأخيره او تقديمه بأيه حال من الاحوال ففى لثالثه موعد عوده ابى من العمل نلتف جميعا حول مائده الطعام اكلنا ام لم ناكل المهم هو تواجدنا جميعا حول المائده واثناء الغداء يطمئن ابى علينا بكلمات قليله عما فعلنا ه صباحا وما سنفعله حتى المساء 0
ولكن هيهات ايامنا من ايام اولادنا الان 00
شعرت ان هناك مخطط قادم الى منذ رأيت ثلاثه رؤوس مجتمعه على شكل دائره وبينهم نقطه كأنها محور الدائره 00نعم هم ابنائى الثلاثه تتوسطهم شهوده اخر العنقود 000" حتى الآن0000"
ثم تقدم المتحدث الرسمى بأسمهم 00كبير الفرقه انس باشا 000
انس : ماما-مش احنا الحمد لله نجحنا وجبنا درجات حلوه ؟
انا : الحمد لله يا حبايب ماما يا ناجحين انتم
انس : طيب فين هديتنااااا؟
التف حولى ابنائى عن يمينى وعن يسارى ولرتمت شهد فى حضنى
فقلت : أؤمروا يا حبايبى 00عاوزين ايه؟
انطلقوا بصوت واحد كطلقه مدويه 00
- عاوزين كمبيوتر
نظرت اليهم متعجبه 00
- كمبيووووتر مره واحده ؟
قالت أسيل الابنه رقم 2 00
- لاء يا ماما 3 حتت شاشه وكيبورد وكيسا
- ايه 00ايه ! واحده واحده ايه اللى بتقولوه ده ؟
انس "بمنتهى الهدوء" :يا ماما احنا كلنا فى المدرسه بناخد حصص كمبيوتر ولازم لما نرجع البيت نراجع اللى بناخده عملى مش بس من الكتاب وخلاص00وكل اصحابنا عندهم كمبيوتر فى البيت
اكمل "آسر" الصغير بلهفه
- وكمان يا ماما فى جيمز
سارعه انس بكف يده ليسد فمه ويقطع عليه حديثه خشيه ان يفسد ما خططه هو العقل المدبر لاخواته الصغار مبتسما ابتسامه عريضه صفراء لعلها تنسينى ماسمعته من آسر
- طيب ادونى فرصه اكلم بابا ونشوف
- هييييه هيييييه تعيش ماما تعيش ماما هيييه هييييه وأمطرونى بوابل من القبلات فى كل اتجاه0
جلست افكر فى امر طلب ابنائى لعلى اجد ما اقنع به زوجى من حيث شراء جهاز كهذا قد يؤثر على ميزانيتنا الان 00اذن لابد ان يكون له مردود ملموس على الاولاد ودراستهم 00ولكن كيف؟؟
اعددت شاى العصارى المتميز برائحه النعناع الاخضر الذى اعتدنا تناوله فى بلكونه غرفه المعيشه حيث لى طقوسى الخاصه منذ كنت بمنزل ابى قبل الزواج 00الست ثومه والشاى بالنعناع فى البلكونه مابين العصر والمغرب00
زوجى : ايه بقى يا ستى الاحاديث الجانبيه اللى بينك وبين كتاكيتك دى ؟؟
انــــــا: لااااا ما بقوش كتاكيت خالص ده ريشهم كبر وعاوزين يطيروا كمان
" نظرة تعجب مع ارتشاف رشفه طويله بحذرمن الشاى الساخن متسائلا بعينه 00"
انـــا : هاقولك انا 00الاولاد عاوزين كمبيوتر
زوجى: نعم كمبيوتر؟ ودول هايفهموا فيه؟؟ اذا كنت انا ابوهم مابفهمش فيه
انـــا : وطيييى صوتك ماتخليهمش يحسوا اننا مش مواكبين عصرهم 0
هما بيدرسوه فى المدرسه واحنا داخلين على سنه 2000 وده عصرهم وعصر الكمبيوتر 0
وبعد حوار وجدال وسؤال القريب والبعيد واهل الخبره والتخصص وكل اللى يعرف حاجه عن الكمبيوتر استقر بنا الحال على شراء كمبيوتر بالتقسيط00
ولا انسى اطلاقا هذا اليوم 00سعاده بالغه غمرت وجوه الابناء ولمعه فرح ظهرت فى عيونهم جميعا لدخول هذا الجهاز حياتنا 0
شعرت بأن هناك كائن وليس جهاز انضم الى اسرتى الحبيبه لما شعرت به وعبر عنه ابنائى من سعاده وفرح بقدومه الينا 0
وبدأنا الجد0000
امسكت بالكتالوج بعد ان قام المهندس بتركيب جميع الوصلات وتشغيله وتعليمنا كيفيه الفتح والغلق ولمحه سؤيعه عن امكانيات الجهاز ونصحنا بعد ان تأكد من جهلنا بالموضوع برمته بأخذ دورات لتعليم اساسيات الكمبيوتر
تقدم آسر " 7سنوات " بكل ثقه قائلا: ممكن انا اللى افتحه الاول يا ماما؟
- تعرف؟؟؟؟
-اه طبعا ده سهل جدا
- جلست على الكرسى وكلى تركيز وبدأ صندوق الدنيا العجيب فى العمل وقد تصارع الاربع عباقره حتى شهد ذات السنوات الاربعه على من يمسك بالماوس اولا ومن يليه00
كان لابد من نقطه نظام هنا 00وكالعاده انت لها يا زوجى الحبيب
==========================
مرت 6 ايام من العطله يتسابق الجميع منذ الصباح لارضائى حتى اسمح اهم بفتح الكمبيوتر
وفى المساء ياتى دورى انا وزوجى لفك طلاسم هذا الجهاز العجيب الذى جعلنا اميين بسببه00
وقد علمت تليفونيا من صديقه لى اننى استطيع ان اتحدث من خلال الكمبيوتر دوليا دون ان يؤثر على فاتوره التليفون 00وذلك عن طريق الانترنت 00وكيف ذلك؟؟
صديقتى قائله:
- خليك معايا على التليفون واعماى اللى هاقولك عليه 0
-اوك معاك
- عندك برنامج اسمه كذا على الجهاز ؟
- استنى كده -----اه موجود اهو
- طيب وصلى السلك بتاع التليفون فى الكيسا من ورا فى مكان مخصوص له ----هاا لاقيتيه ؟
- تمام ووصلته
- افتحى البرنامج واتصلى بقى
- مرسيه يا حبيبتى كده اقدر اتكلم دولى براحتى ؟
- طبعا اكيد
- اتصل بمين؟؟ اتصل بمين يا ولاد ؟ مصر طبعا
- نكلم تيته وجدو
- الوووو ايوه يا ماما هاتى بابا
وهاتى اخواتى
وهاتى الجيران
كلموا تيته ياولاد
كلموا جدو يا ولاد
وولاد خالتو 00وخالو
وبالطبع مكالمه مماثله لحماتى وعمات الاولاد وجيران الجيران
ماهو نت بقى !!!
ظللنا نتحدث قرابه الساعه والفرحه تغمرنا بسماع صوت الاهل والاحباب وهو يملء اركان المنزل وكأننا جميعا نجلس حول الكمبيوتر سويا
الله ما أروعك جهاز 00حتى لو انتهى بك الامر كونك تليفون دولى يصل بيننا وبين الاهل فقط
وجاء موعد سداد فاتوره التليفون 00الا ونجد المكالمات الدوليه فى يوم واحد تعدت اضعاف قيمه الفاتوره منذ تواجدنا بهذا البلد 00
ماذا حدث؟؟
لابد ان هناك شىء ما خطأ
ياااااا الهى !!!
لقد شبكنا سلك التليفون بالكمبيوتر مباشرةا وليس بالانترنت اولا
ااااااااااااه من الجهل يا نااااس
مكالمه دوليه لساعات ؟؟
بالتأكيد ساستفيد من هذه الواقعه 00لكن بعد ايه؟؟
بعد خراب مالطا0
ليست هناك تعليقات:
إرسال تعليق